الخميس، 15 أكتوبر 2009

مدرسة الحياة



لو ركزنا في العنوان شوية هانكتشف فعلا ان الحياة دي زي المدرسة بالظبط .. وكل تجربة فيها زي المعلم اللي بيعلمنا حجات كتيرة اوي .. وكل موقف في حياتنا بيحصلنا بيكون مخبي وراه حكمة اكبر ..فاحيتنا مليانة حجات حلوة وحجات مرة !! ودي من رحمة ربنا سبحانه وتعالى بينا

,
لأن اذا ممرناش بمواقف صعبة ..يبقى هانتعلم ازاي !! اذا مفيش موقف تقدر نقول عليه وحش وسيئ.. لان كل موقف وكل تجربة بنعدي بيها في حياتنا بتمثل دور كبير فيها للي هايحصل بعد كدة حتى لو احنا شايفنها صغيرة!

بس لو بصينا لحياتنا هنلاقي في يوم بيمر حلو , ويوم نص نص ويوم ! ياستار !!

وتلاقي ناس سعات بننزل من البيت وهي متشائمة..ماعرفش ليه..مع ان دة حرام طبعا !

فتلاقيهم نازلين الشارع وهم محبطين ويعقدوا يقيسوا كل موقف حصلهم بالملي !! ويتخانؤوا مع اللي جنبهم في المواصلات لأتفه الأسباب ,

طب لي احنا بنحبط كدة بسرعة ؟ليه ما بقاش الشعب المصري مبتسم زي زمان ؟ ليه لما تنزل الشارع تشوف وشوش مكتأبة ؟ وخاصة بردو من الشباب ! ويا سلام بقة على الناس اللي في الأتوبيسات , بصراحة اكتئاب مفيش لا قبله ولا بعده.
ودة يخلينا نسأل ليه احنا حجات كتير مش عاجبانا في بلدنا ؟؟والسؤال الاعظم من كدة ليه احنا بنكون مسلمين بالأمر الواقع وبنخاف نغيره؟.


بس بصراحة انا مش هالوم الناس اللي زهقانين من والتلوث والمخلفات وخلافه ..ومستوى التعليم ..والبطالة و ...الخ
دة كفاية بس الزحمة القاتلة اللي أنا بواجهها كل يوم في طريق العباسية المؤدي للجامعة :) !


بس اللي ممكن
يزود الطين بلة , واللي يخلي الناس تزداد احباط ويأس هو اعتياد بعض الناس على بعض السلبيات دي لدرجة انها اصبحت جزء من حياتهم, وعدم قدرتهم على التغيير مع انهم نفسهم يغيروها , بس خوفهم او شعورهم بالقلق من التغيير و التحول الى الحال الأحسن بيجعلهم راضين باللي هم فيه !

بس طبعا بتختلف الطريقة اللي بيواجه بيها كل شخص مشاكله؟؟ ففي ناس تحبط تماما وتفضل موقفة حياتها على الاحباط دة , وفي ناس بتعدي وتكبر دماغاها بس ما بتعملش حاجة . وفي ناس بتصلح من نفسها وما بتفضلش ساكتة !


دة حتى كنت في مرة باحضر ندوة في الكلية عن التنمية البشرية وازاي الواحد يطور من نفسه والحجات دي ..والميزة في الندوات دي انها بتحمس الواحد جدا وتخليه عايز يطير ويعمل اي حاجة يحسن فيها من نفسه ويحسن من اللي حوليه !! ولكن بسبب الجو العام الواحد سرعان ما بتروح الحالة دي وبيقل شعور الحماسة تدريجيا !

والسبب اللي انا اكتشفته ,, ان احنا لما بنفشل في امر ما بنعلق الفشل دة على الناس والحكومة والشعب والاسرة والمجتمع

!! كل دة !..اه والله .
مين فينا مابيعملش كدة الا ناس قليلة طبعا..بس عموما اسلوب التفكير دة منتشر !!..طب ليه بنقعد نلوم بلدنا على كل اللي فينا وخلاص ! وكنت لما باسمع اراء الطلاب اللي كانوا في الندوة عن اسباب احباطهم...احداها انو مفيش فايدة..محدش بيشجعنا ..محدش بيساعدنا .!! احنا جربنا كتير اوي وفشلنا نحسن من نفسنا لان كل حاجة هنا بتدعو للاحباط والفشل !!!

لاحظوا حاجة (ان اللي بيكلموا دول عمرهم اد اي يعني!! 20 سنة بالكتير)

يعني لحقوا يجربوا امتى ؟؟

طب مهو بالطريقة دي والروح دي عمرنا ما هنتقدم ابدا , وبعدين هما مستنيين لما حد يطورهم !! المفاجأة الغير سارة ان ما فيش حد هيعمل كدة لان كل واحد مشغول بنفسه وبحياته ,,الا من رحم ربي !
فاحنا هانفضل لحد امتى نفكر بالطريقة دي بالطريقة اللي تهد اي برج ديه؟؟

والمشكلة ان دة بقة اسلوب عام في التفكير.
على فكرة انا مش بعطي مواعظ ولا اعمل نفسي مصلحة اجتماعية ولا الكلام الكبير دة !

لكن انا عن نفسي زهقت من كتر التفكير بالطريقة المحبطة دي ..

لأني انا كمان كنت سعات بفكر بيها !! وزهقت كمان من تعليق مشاكلي كلها
على البلد والناس والخلق!!!حاجة مملة صح ؟؟!! اصل لو مش انا اللي هاغير نفسي محدش هيغرني وبلدنا تستاههل منا ان احنا نتغير !! لكن السؤال ماذا عنكم انتم ؟؟




هناك 4 تعليقات:

  1. woooooooooooooooow bgd el mawdoo3 aktar mn raw3a w mohem gdan.....el e7sas bel e7bat da mn aktar el 7agat elly bto2af fe tare2na.....mafeehash 7aga law 2abelna mashakel w 2azamat fe tare2na w z3elna w7aseena bel e7bat....laken el moshkla el 7a2i2ia enena nfdal 2a3deen gowa kawka3et el ekt2ab de w man7awelsh nfakar....el 7ozn lmma bizeed 3n 7ado biwa2af dema3'na 3an el
    tafkeer w bi3ml 7ala mn el balada w el la mobalah.......
    3shan kda lazm nt3'aiar w ykoon 3andena POSITIVE ATITUDE w nshoof el 7agat b3een tania 3een afdal....asl mafeesh 3asaia se7ria 7at5aly 7aiatna 7lwa ...kol wa7ed lazm ybtdy bnafso w mai2olsh(hwa ana ya3ny elly 7a3'aiar el koon)

    if u wanna make the world a better place... take alook at your self and make the change
    MICHEAL JACKSON

    lazm bgd nbatal ya2s l2an da msh 7ai3'aiar 7aga 7awaleena..w n5aly emana brabena aktar mn kda

    bgd tslam edeeky 3al mawdoo3 el to7fa da w bgd eslobek fel ktaba raaaaaaaaaaaaaaaaaaa2e3

    ردحذف
  2. شكرا بجد على التعليق الاكثر من رائع ..وبجد الكلام اللي انتي بتقوليه جميل جدا وللاسف ناس كتير بتفكر بالطريقة اللي انتي حذرتي منها فوق ..ويمكن احنا كمان سعات بنفكر بنفس الطريقة لان احنا في الاخر بشر ..يس المهم منخليش الطريقة دي في التفكير تسيطر علينا لان ن لو كل فكر بطريقة ايجابية هنلائي الدنيا احسن من كدة بكتير..ولا يكفي ان احنا نطلع نكت على مشاكلنا ومنحلهاش لازم الضحكة تلازم الواحد في مشاكله بس يعرف ازاي بردو يحلها... اشكرك اوي على العليق الجميل دة ولازم ان شاء الله تنوري كل مواضيعنا القادمة :)

    ردحذف
  3. أنا مش لاقي حد يطورني

    بيرفضوا يطوروني من الإنتر فيو

    :(

    ------------------------

    مدونة تمام التمام
    شدي حيلك أكتر
    ----------------------
    خطيب أختك
    (A)

    ردحذف
  4. لا ان شاء الله يا (A) هتعدي الانترفيو و بامتياز كمان :) :)ومش هيرفضوا يطوروك ك:):):) ,ومبروووك على المدونة بتاعتك , على فكرة جامدة جدااااااا :)

    http://3ateloon.blogspot.com

    ردحذف